جيبتلي صاحب وحبيته
زقنى فى المترو زقيته
واما مات فيا ومت انا فيه
روحتله بيته وعزيته
حزن يا بقال ورا الجامع
هات بنص ريال عسل فى الكوز
ده اللى كان عيل بقى شاعر
واللى كان ضاحك بقى أراجوز
حبني الشارع وحبيته
عض قلبي الليل وعضيته
خضني الإنسان وخضيته
لما بان من وشه عفاريته
عدى فيا القمح سمرني
عدى فيا الفجر صبرني
عدى فيا الحزن غيرني
عدى فيا العمر كبرني
خدني م اللفة لمريلتي
خدني م التسنين لحصالتي
خدني من مدرستي ع الجامعة
خدني م الترعة على الاسفلت
خدت م الاتوبيس مراياته
خدت م السواق حكاياته
خدت م الركاب تذاكر موت
يا للي وحشاني متوحشينيش
ضحكك السكر محلانيش
خوفت م المطرة قفلت الشيش
ليه فضل اسمك على الشباك
كنت جايب دبلة وغويشة
كنت شارب حاجة مغشوشة
شفت شبهك قاعدة في الكوشة
قلت هي لا مش هي
فتشتني الدمعة عن الميه
كنت أنشف من حطب محروق
حزن يا محول خطوط سيرى
حزن يا عطار في باب اللوق
شوفلي تحويجة لتفسيري
حط ريحه بُن لضميري
شوفلى عود أصلب من المغشوش
ردني ع الباب عطب روحي
جابلي ناي وزتون مطروحي
مُر انا يا صاحبي لو دوقتني
جيت اقول الآه ما صدقتني
يطرح إيه الملح غير مالح
يطلع إيه م الجرح غير مجروح
ليه ما تصفاشي لغير صافي
ليه في عز الحوجة بتجافي
شوفتني غاطس ولا طافي
كنت بندهلك حلاوة روح
حزن يا بقال ورا الجامع
هات بنص ريال عسل في الكوز
خد سنين الجرى وسنيني
هاتلى سن غزال دهب عيني
قطع الاسفلت شرايينى
هات بياض القطن شاش اللوز
-=-
